Meet Our Trainees

Запознај ги нашите студенти на Oбуката за 3D моделирање и анимација и на Обуката за Визуелни ефекти за филм

Со поддршка на Проектот на УСАИД за развој на деловниот екосистем и во соработка со компанијата за филмски визуелни ефекти и 3D моделирање и анимација – FX3X, во тек се две 6 месечни специјализирани и интензивни обуки со цел поттикнување на вработување, и тоа: Обука за 3D Моделирање и Анимација во организација на ЊуМенс Бизнис Акцелератор и Обука за визуелни ефекти за филм во организација на нашите соработници од VFX Nest.

Во продолжение ви претставуваме дел од нашите учесници.

ИГОР ЈОВАНОВСКИ, 26 години, Скопје – Учесник на Обуката за Визуелни ефекти за филм
Дипломиран на Факултет за Економски науки (е-бизнис), Скопје

Игор Јовановски, пред својот лаптоп додека работи на нова сцена


Коментар за Игор Јовановски од Кариерната советничка, Катерина Златановска Попова, вклучена во процесот на селекција на кандидатите:

За да може да ја посетува обуката Игор речиси секој ден патуваше од Куманово до просториите на Fx3x.com во Скопје, а кога не можеше да дојде ја следеше онлјан. Тој е голем вљубеник во филмската индустрија, а има голем интерес и за музика, историја и фотографија.

Целта на Игор со оваа обука беше да направи кариерна промена и од економија да се пренасочи кон визуелните уметности и да стане Артист за визуелни ефекти. Неговата голема внатрешна мотивираност, емотивна стабилност и спремност да учи нови работи му помогнаа во тоа.

1. Што Ве мотивираше да се запишете на обуката за 3D моделирање и анимација?

Мотивацијата да се запишам на обуката произлезе од мојата долгогодишна желба и интерес за филмот и филмската индустрија.

Иако на 18 години се одлучив да се запишам на Економски факултет, интересот за филмската индустрија длабоко во мене не згасна и по завршувањето на истиот. Кога дознав за спремноста и високото ниво коешто го нуди обуката, без размислување се пријавив.

2. Од каде потекнува интересот за оваа област? Дали имавте некакво предзнаење?

Уште од многу мал имам љубов кон оваа област.

Интересот, првично се разбуди од самото гледање на филмови. Потоа, со интензивно истражување на начин на кој се прават филмовите, си дадов шанса на самиот себе и успеав да ги креирам моите први кратки филмови, во коишто има елемент на визуелни ефекти.

3. Какви се впечатоците и искуствата од обуката до сега? Што Ви остави најголем впечаток?

Премногу сум задоволен што бев дел од ваква обука. Стекнав нови знаења и вештини, благодарение на менторите кои беа комплетно професионални, но и пријателски настроени што многу ни помогна обуката да биде забавна, интерактивна и успешна за сите нас.

Работевме на софтвери како што се Nuke, SilhouetteFX и 3DEqualizer, на коишто корисници им се “Walt Disney Animation Studios”, “Industrial Light & Magic” и многу други.


Обуката ги надмина сите мои очекувања, бидејќи секое предавање беше пропратено од страна на експерти и мастери во свои области: Roto, Paint, Matchmove и Compositing.

4. Како би сакале да го продолжите кариерниот пат? Кои се Вашите очекувања по завршувањето на обуката?

Како почетник, ги разгледувам овие три области преку кои би сакал еден ден кариерата да ми се движи. Тие се rotoscoping, painting и compositing.

По успешно завршена обука би сакал да се вработам во компанија како “fx3x”, да учествувам во креирање на професионални филмови и да придонесувам во создавање на нови успеси за компанија во којашто ќе работам и секако да продолжам да си го надоградувам своето знаење бидејќи ова е тоа што ме прави среќен.

5. Што би им порачале на сите кои имаат интерес да се стекнат со стручни вештини од оваа област?

Сите што имаат желба и интерес во оваа област, ќе имаат можност преку обуката да видат во пракса, од прва рака, што всушност се визуелните ефекти и која е нивната улога во правење на еден филм.


Би им препорачал, без размислување да го направат првиот чекор и да се запишат на обуката која ќе им придонесе многу нови вештини и која ќе им ги отвори патиштата каде што креирање и учествување во филмот нема да остане само желба, туку ќе стане и реалност.

ПРЕДРАГ ИКОМОНОВСКИ, 50 години, Скопје – Учесник на Обуката за Визуелни ефекти за филм
Дипломиран на Технолошко-Металуршкиот Факултет, Скопје

Предраг Икомоновски, за време на предавањата во просториите на Fx3x


Коментар за Предраг од Кариерната советничка, Катерина Златановска Попова, вклучена во процесот на селекција на кандидатите:

Предраг дојде со голема решеност да го надгради своето знаење во областа на визуелните ефекти и да биде дел од компанијата Fx3x.

Иако беше меѓу повозрасните Предраг имаше јасен план, да се фокусира на најновите технологии во областа и да работи и надвор од часовите за целосно да го совлада материјалот.

1. Што Ве мотивираше да се запишете на обуката за 3D моделирање и анимација?

Од секогаш ме интересирало како се создаваат магичните моменти во филмовите.

Сакав да навлезам подлабоко со изучување на програмите кои се користат во VFX индустријата. Со посебен интерес за Compositing.

2. Од каде потекнува интересот за оваа област? Дали имавте некакво предзнаење?

Одредено време работев како Rotoscoping artist. Така се запознав со The Foundry Nuke, кој е совршена алатка за манипулирање на секаков вид снимен видео материјал. Но бидејки е премногу обемен и комплексен, осознавање на неговите можности нема крај.

3. Какви се впечатоците и искуствата од обуката до сега? Што Ви остави најголем впечаток?

Обуката е одлично конципирана. Од вовед во кинематографија до раздледување на сите можности и кариери, во кои понатаму секој од нас може да се фокусира и да просперира.

Најголем впечаток ми остави снимањето на кадри во кои сите земавме учество. Менторите се посветени на пренесување на нивното знаење и секогаш подготвени за прашања, дури и на паузите.

4. Како би сакале да го продолжите кариерниот пат? Кои се Вашите очекувања по завршувањето на обуката?

Би сакал повеќе да се посветам на најновите текови во филмската индустрија, како на пример Virtual Production.

Оваа технологија им овозможува на режисерите и на актерите да бидат непосредно инволвирани во изгледот на крајниот продукт. За ова постојат повеќе програми кои се воглавно произлезени од Gameing индустријата, но мојот фокус е Unreal Engine.

Очекувам дека реноминарата фирма Fx3x ќе има се поголема потреба на обучен кадар во оваа област.

5. Што би им порачале на сите кои имаат интерес да се стекнат со стручни вештини од оваа област?

Би им порачал да ги посетуваат овие курсови кои ке им помогнат да изберат во кој дел од создавањето на филмските ефекти би можеле да се пронајдат себеси. На YouTube веќе има многу туторијали за различни програми, но неможат реално да имаат увид во тоа кој од нив највеќе се користи во филмската индустрија.

КАТЕРИНА КОЛЧАКОВСКА, 22 години, Скопје – Учесник на Обуката за Визуелни ефекти за филм
Дипломирана на Факултет за Архитектура и Дизајн при Универзитетот Американ Колеџ, Скопје

Катерина Колчаковска, пред својот лаптоп со една од нејзините визуелизации


Коментар за Катерина Колчаковска од Кариерната советничка, Катерина Златановска Попова, вклучена во процесот на селекција на кандидатите:

Катерина е уникатна млада девојка со голема пасија за научна фантастика и дизајн на видео игри.

Таа е позитивна личност, со одлични комуникациски способности, отворена за нови искуства. Има високи когнитивни способности, посветеност на обуката, емотивна стабилност и самоконтрола со што има одличен потенцијал да стане и сениор артист во иднина.

1. Што Ве мотивираше да се запишете на обуката за 3D моделирање и анимација?

Уште додека студирав сакав да се запишам на оваа Обука, но поради обврските не бев во можност да ја посетувам.

Од секогаш бев импресионирана од визуелните ефекти.

2. Од каде потекнува интересот за оваа област? Дали имавте некакво предзнаење?

Интересот за цртање и анимираните филмови потекнува од мојата најрана возраст. Додека другите си играа со кукли јас бев Son Goku (од Dragon Ball), татко ми ми направи нунчаки и никаде не одев без нив.

Талентот за цртање и уметност дополнително ми оди во прилог и од кога знам за себе цртам и многу сакам компјутерски игри (лани земав 3та награда на A1 Game Fest во играта Hearthstone). Цртањето, креативноста, гејмерството и компјутерите ми се во крвта.

Немав никакво предзнаење за програмите кои ги изучувавме на курсот, но имам доста добра основа во поглед на уметничкиот дел. Во јуни 2020, дипломирав на Факултетот за Архитектура и Дизајн при Универзитетот Американ Колеџ во Скопје и станав Дипломиран инженер Архитект со највисоко звање “Magna cum Laude”.

Во текот на студирањето користев повеќе компјутерски програми за дизајнирање, цртање и архитектонско проектирање и многу сум благодарна на мојот професор Др. Владимир Десков и Др. Мишко Ралев кој уште повеќе ја зголемија желбата да ја насочам мојата кариера кон компјутерскиот дизајн и да се запишам на оваа Обука.

3. Какви се впечатоците и искуствата од обуката до сега? Што Ви остави најголем впечаток?

Обуката е многу содржајна, исклучително уникатна и професионална, менторите се прекрасни, ги знаат одговорите на сите наши прашања.

Презадоволна сум од курсот. Ги надмина моите очекувања. Најголем впечаток ми оставија обучувачите со нивниот пристап и целата атмосфера на курсот.

4. Како би сакале да го продолжите кариерниот пат? Кои се Вашите очекувања по завршувањето на обуката?

Сакам да ја продолжам мојата кариера како дел од тимот на FX3X, a мојот сон е да работам за Blizzard и да правам cinematics за World of Warcraft.

5. Што би им порачале на сите кои имаат интерес да се стекнат со стручни вештини од оваа област?

Им препорачувам да се стекнат со професионални вештини кои што ги обезбедуваат специјализираните обуки на Њуменс Бизнис Акцелераторот и VFX Nest, да се надградуваат секојдневно и да не се откажуваат од своите соништа.

ИВИЦА ЃОРЃЕВСКИ, 27 години, Скопје – Учесник на Обуката за 3D Моделирање и Анимација
СУГС Гимназија “Никола Карев”, Скопје

Ивица Ѓорѓевски, при изработка на вежба со 3D модел


Коментар за Ивица од Кариерната советничка, Катерина Златановска Попова, вклучена во процесот на селекција на кандидатите:

Ивица има голема страст да работи во областа на анимирани филмови и 3D и верува дека посетувањето на оваа Обука ќе го доближи до реализацијата на тој сон.

Креативен е, упорен и мотивиран да го даде најдоброто од себе. Верува дека доколку човек сака може сè да научи.

1. Што Ве мотивираше да се запишете на обуката за 3D моделирање и анимација?

Најголема мотивација за мене беше тоа што обуката се одвива во x3x, компанија која има работено на голем број холивудски блокбастери, a како ментори се ангажирани едни од нивните најдобри артисти со долгогодишно искуство во областа.

2. Од каде потекнува интересот за оваа област? Дали имавте некакво предзнаење?

Како голем љубител на научна фантастика и видео игри, интерес за моделирање и анимација имав уште како дете.

Со моделирање започнав да се занимавам еден до два месеци пред да дознаам за Обуката за 3D моделирање и анимација.

3. Какви се впечатоците и искуствата од обуката до сега? Што Ви остави најголем впечаток?

Обуката опфаќа сè околу процесот и се учи премногу.

Менторите се врвни професионалци со преку 10 години искуство во областа, па токму тие и нивната посветеност ми оставија најголем впечаток.

4. Како би сакале да го продолжите кариерниот пат? Кои се Вашите очекувања по завршувањето на обуката?

За кариера во светот на 3Д имав размислувано долго време пред да аплицирам за Обуката, а со знаењето кое го стекнав тоа стана возможно.

По завршување на обуката очекувам што поскоро да добијам шанса и да работам за компанија како Fx3x.

5. Што би им порачале на сите кои имаат интерес да се стекнат со стручни вештини од оваа област?

На сите заинтересирани би им препорачал без двоумење да аплицираат на следната обука, да имаат желба и да бидат упорни.

АЛЕКСАНДРА СТОЈАНОВСКА, 21 години, Прилеп – Учесник на Обуката за Визуелни ефекти за филм
Студент на ФЕИТ (Електроенергетика, автоматизација и обновливи извори на енергија), Скопје

Александра Стојановска, во просториите на Fx3x за време на Обуката за Визуелни ефекти за филм


Коментар за Александра од Кариерната советничка, Катерина Златановска Попова, вклучена во процесот на селекција на кандидатите:

Александра има голем интерес да учи нови работи и верува дека со континуирана надоградба се отвораат многу кариерни можности. Таа сака делата да зборуваат за нејзините квалитети и има високо развиена способност за креативно решавање на проблеми.
Александра ја мотивираат нови предизвици и пријателска работна атмосфера, и има капацитет да стане одличен визуелен артист и успешен тим лидер.

1. Што Ве мотивираше да се запишете на обуката за 3D моделирање и анимација?

Информацијата дека ќе се одржува ваква обука ја добив од социјалните мрежи.

Она што ме мотивираше да ја пополнам апликацијата за учество беше желбата да знам како се одвиваат процесите позади големиот екран и желбата да ги проширам и подобрам моите дигитални вештини за обработка на видео материјали.

Како љубител на филмската уметност, сакав да бидам дел од процесот на креирање на истата и ова е шанса што не сакам да ја пропуштам.

2. Од каде потекнува интересот за оваа област? Дали имавте некакво предзнаење?

Често сум импресионирана од најновите постигнувања во светот на технологијата. Студирам на факултетот за електротехника и информациски технологии, постојано сум во допир со технологијата, па полето на визуелни ефекти во филм за мене е совршена комбинација на љубовта кон филмот и технологијата.

Го сакам светот на визуелните ефекти во филм бидејќи сѐ што може да си замислиме, може и да го креираме.

Снимањето и монтирањето видеа ми е хоби, па пред да го започнам курсот имав само скромни знаења и вештини за снимање и монтирање на видео материјали, работа со неколку програми за едитирање на слики и основни познавања од графички дизајн.

3. Какви се впечатоците и искуствата од обуката до сега? Што Ви остави најголем впечаток?

Имам само најдобри впечатоци и искуства. Ми се допаѓа тоа што обуката е интензивна и се здобивамe со темелно знаење. Вежбите се одлични и имаме доволно време за сето знаење да го апсолвираме.

Координаторот на Обуката и останатите обучувачи се повеќе од расположени да одговорат на нашите прашања, да ни помогнат во било што, се развиваат одлични дискусии и слушаме одлични искуства за работата во оваа област.

Најголем впечаток досега ми остави тоа што не постои шаблон за работа, туку секој кадар на кој работиме е посебен предизвик.

4. Како би сакале да го продолжите кариерниот пат? Кои се Вашите очекувања по завршувањето на обуката?

Како и во секоја кариера, така и тука е важно да се усовршуваш и надоградуваш, па така и по завршување на обуката би сакала да продолжам да ги усовршувам моите знаења и вештини, било тоа да е во FX3X или дома.

Бидејќи FX3X е една од ретките компании кај нас во оваа област од филмската индустрија, првенствено би сакала тоа да продолжам да го правам таму како дел од нивниот тим.

5. Што би им порачале на сите кои имаат интерес да се стекнат со стручни вештини од оваа област?

Мислам дека самоиницијативноста е една од главните одлики кои треба да се имаат во било која област, па би им препорачала да ги истражат можностите на интернет.

Дополнително, доколку сакаат да се стекнат со стручни вештини во областа, да ја контактираат компанијата FX3X и академиите со кои соработуваат (VFX Nest Academy за визуелни ефекти и ЊуМенс Бизнис Акцелератор за 3D моделирање и анимација) каде би можеле да посетат обука слична на оваа.

ТИАНА МИТОВСКА, 21 години, Скопје – Учесник на Обуката за 3D Моделирање и Анимација
Студент на ФИНКИ (Е-технологии), Скопје

Тиана Митовска, со свое дело изработено со вештини стекнати за време на Обуката за 3D моделирање и анимација


Коментар за Тиана од Кариерната советничка, Катерина Златановска Попова, вклучена во процесот на селекција на кандидатите:

Тиана е тимски играч кој сака да го споделува нејзиниот успех и со другите членови на тимот. Таа добро се справува со работа под притисок, нема страв од нови работни задачи и може успешно да се снајде и со кратки рокови.

Тиана да учи нови работи и да биде дел од компанија како Fx3x што може да ѝ понуди континуиран професионален развој.

1. Што Ве мотивираше да се запишете на обуката за 3D моделирање и анимација?

Сакам работи во кои можам креативно да се изразам, а областа на 3D моделирање и анимација е одлична струка за тоа. Кога дознав за обуката веднаш знаев дека треба да се пријавам.

Веќе бев запознаена со работата на компанијата fx3x и знаев дека се лидери во оваа индустрија. Веројатно тоа ми беше и најголемата мотивација – можноста да учам од најдобрите.

2. Од каде потекнува интересот за оваа област? Дали имавте некакво предзнаење?

Интересот за оваа област кај мене потекнува уште многу одамна. Отсекогаш сум сакала да знам кој е процесот на изработка на анимирани филмови и кои се техниките што треба да се совладаат.

Имав основно предзнаење од кратки претходни настани и работилници за 3д моделирање и анимација, но сакав вистински да се усовршам во оваа област.

3. Какви се впечатоците и искуствата од обуката до сега? Што Ви остави најголем впечаток?

Програмата е одлична и доста напредна, а менторите се максимално посветени и секогаш отворени за прашања и совети. Посебно ми се допаѓа што покрај теоретски предавања имаме и практичен дел каде го применуваме наученото.

Сѐ ми беше подеднакво интересно, но доколку би морала да одвојам еден дел тоа би било моделирањето.

4. Како би сакале да го продолжите кариерниот пат? Кои се Вашите очекувања по завршувањето на обуката?

Кариерниот пат сакам да го продолжам во оваа индустрија и да станам професионалец во мојата работа и верувам дека оваа Обука ќе ми го овозможи тоа.

5. Што би им порачале на сите кои имаат интерес да се стекнат со стручни вештини од оваа област?

Би им порачала на сите кои имаат интерес за оваа област да не се двоумат, мислам дека ова е местото каде што би го добиле знаењето кое им е потребно од ментори кои што се професионалци во својата работа.

РАДЕ РАДЕВСКИ, 21 години, Скопје – Учесник на Обуката за 3D Моделирање и Анимација
Дипломец на Факултетот за Анимација, Скопје

Раде Радевски, за време на фестивалот Мурал (2019 год.) каде црташе мурал од филмот „Сталкер“ на еден од ѕидовите на влезот од Кинотека.


Коментар за Раде од Кариерната советничка, Катерина Златановска Попова, вклучена во процесот на селекција на кандидатите:

Раде е вистински „тивок“ огромен талент кога се разботи за анимацијата. Тивок бидејќи тоа е дел од неговиот карактер, а огромен талент бидејќи сите негови досегашни проекти гласно зборуваат за неговата креативност и квалитет. Тој ужива во можноста да работи во тим и притоа да ги покаже сите свои лидерски способности и преку својата промисленост, темелност и трпеливост и желба за еднаквост.

Раде е целосно подготвен да се посвети на остварување на својата желба – својата кариера да ја гради како 3D Артист за анимација и моделирање.

1. Што Ве мотивираше да се запишете на обуката за 3D моделирање и анимација?

Уште од најрана возраст бев особено привлечен од анимацијата. Кога се запознав со 3Д, сфатив дека тоа е медиумот во кој што се препознавам. Следниот чекор за мене беше да го усовршам претходно стекнатото знаење, на оваа обука креирана во соработка со Fx3x која е една од водечките компании од оваа област кај нас.

Најголема мотивација да се запишам на обуката за 3Д Моделирање и Анимација ми претставуваше фактот дека вистински и продлабочено ќе ги научам техниките кои ме интересираат во 3Д Индустријата, благодарение на менторите кои имаат долги години професионално искуство.

2. Од каде потекнува интересот за оваа област? Дали имавте некакво предзнаење?

Бидејќи од секогаш се интересирав за Анимација и имав посетувано неколу работилници од оваа област во средно училиште, решив да се запишам на факултетот за Анимација при Универзитетот за аудиовизуелни уметности. Дипломскиот труд го изработив во 3Д техника пред да се запишам на обуката.

Имам искуство со работење на едноставни фриленс проекти, но желбата од секогаш ми била да се вработам во професионално студио како Fх3х.

3. Какви се впечатоците и искуствата од обуката до сега? Што Ви остави најголем впечаток?

Досега сум задоволен од сите аспекти на обуката. Менторите се супер и обрнуваат внимание на секој детал во предавањата. Исто така секогаш се на располагање да помогнат со потешкотиите со кои секојдневно се сретнувам. Најголем впечаток ми оставаат часовите за напредна анимација, риг и рендер, бидејќи се предизвикувачки и интересни.

Во една реченица: Обуката и Менторите се супер!

Раде Радевски на својот компјутер додека работи на 3D анимација.

4. Како би сакале да го продолжите кариерниот пат? Кои се Вашите очекувања по завршувањето на обуката?

По завршување на обуката сакам да работам во професионалната индустрија. Очекувам дека обуката ќе ми ги пружи потребните компетенции за да се вработам во студио, а можеби и еден ден да основам мое.

Најголема желба ми е да се вработам како аниматор или ригер (Technical Director) во некоја од светските водечки компании во 3Д индустријата. Имам желба да работам во сите медиуми. Обожавам да работам на игри и играни филмови, но најголема пасија имам кон анимираните филмови и серијали.

5. Што би им порачале на сите кои имаат интерес да се стекнат со стручни вештини од оваа област?

На сите кои се интересираат за 3Д, топло би им препорачал да не се демотивираат бидејќи медиумот е навистина интересен и креативен, доколку се истрајни и упорни во својата работа.

Индустријата е се поголема со секој поминат ден и луѓето кои работат во оваа област се исклучително професионални и креативни. Сметам дека во таква работна околина постои само простор за усовршување и напредување на вашите вештини. Доколку имате интерес и можност да работите како 3Д Артист, не пропуштајте!

АЛЕКСАНДАР ТОЛЕВСКИ, 30 години, Скопје – Учесник на Обуката за Визуелни ефекти за филм
Дипломиран на Факултет за економски науки, Скопје

Александар Толевски, за време на вежби во рамки на Обуката за визуелни ефекти за филм


Коментар за Александар од Кариерната советничка, Катерина Златановска Попова, вклучена во процесот на селекција на кандидатите:

Александар по неколку промени во кариерата успеа да ја пронајде својата страст во креирање на визуелните ефекти во филмската индустрија.

Александар е целосно импресиониран од условите и атмосферата во Fx3x и од тимот на организаторите на обуките и менторите и својата кариера целосно е подготвен да ја гради како VFX Artist. Тој е личност со силни вредности како: темелност, трпеливост, смиреност и посветеност, особини кои се во суштината на професијата во која се гледа во иднина.

1. Што Ве мотивираше да се запишете на обуката за 3D моделирање и анимација?

Најголема мотивација за обуката ми беше љубовта кон филмот и филмскиот универзум заедно со фантастичната напредна технологија на визуелните ефекти и начинот на кој се користат за да не остават без здив на големите платна.

2. Од каде потекнува интересот за оваа област? Дали имавте некакво предзнаење?

Интересот почна со инспирација од неколку разговори со блиски пријатели кои веке работат во Холивуд на блокбастери и другари кои работат токму во Fx3x и нивните успешни приказни. Исто така доволно беше неколку пребарувања на интернет да ме привлечат да сакам сè повеќе да знам во врска со филмот односно визуелните ефекти за филм.

Предзнаење имав само во некои од областите на визуелните ефекти и тоа само од туторијали и од фактот што како хоби го користев интернетот да научам и пробам што повеке со програмите за визуелни ефекти.

3. Какви се впечатоците и искуствата од обуката до сега? Што Ви остави најголем впечаток?

Обуката тече одлично, подобро одколку што очекував. Учам многу нови работи и темпото е на правилно ниво за да вежбаме, научиме и да го примениме наученото и практично во кадрите.

Менторите се одлични професионалци во своите области. Задоволство е да се учи и да се слушаат предавања од инспиративни и успешни артисти како нив. Најголем впечаток ми остави обемот и деталите на процесите до финалниот резултат, односно колку чекори и процеси треба да се поминат и со колку многу внимание и уметнички пристап за да се добие крајниот ефект успешно.

4. Како би сакале да го продолжите кариерниот пат? Кои се Вашите очекувања по завршувањето на обуката?

Би сакал да го продолжам кариерниот пат токму во една од областите кои во моментов ги учиме. Поточно станува збор за Мatchmove и Compositing делот и процесот на работа, кои одлично ми одат. По завршување на обуката очекувам што побрзо да добијам шанса да работам на вистински кадар од клиент, и што побрзо да имам можност да гледам серија или филм и да си го препознаам кадарот на кој што сум работел.

5. Што би им порачале на сите кои имаат интерес да се стекнат со стручни вештини од оваа област?

На сите што имаат интерес да научат визуелни ефекти за филм им препорачувам да направат првично самите истражување со цел да се запознаат со начинот и уметноста на визуелните ефекти.

Доколку е тоа нешто што сакаат да го работат и го изберат како кариерен пат, да се запишат на ваков курс што побрзо, затоа што најдобриот начин да се научи е токму од професионални артисти со искуство и преку работа и пракса дадена од нив.

БОЈАН ВРТЕВ, 20 години, Скопје – Учесник на Обуката за 3D Моделирање и Анимација
2ра година на Факултет за Ликовни Уметности, Скопје (насока: Сликарство)

Бојан Вртев, со неговото матурско дело во Државното средно училиште за ликовна уметност и дизајн – Лазар Личеноски.


Коментар за Бојан од Кариерната советничка, Катерина Златановска Попова, вклучена во процесот на селекција на кандидатите:

Бојан е многу интелигентен и чувствителен млад човек со отворен пристап и размислување кон животот. Тој е многу креативен и има пасија за повеќе комплементарни интереси, како сликарство, компонирање музика, свирање гитара, 3D анимација и моделирање, веб дизајн и стрипови. Тој ужива во процесот на креирање без страв од неуспех, како дел од целосното и значајно искуство при стекнувањето на нови професионални и животни вештини и личен развој.

Со неговата автентичност и уникатен поглед на светот, Бојан е целосно спремен да ги следи своите соништа.

1. Што Ве мотивираше да се запишете на обуката за 3D моделирање и анимација?

На социјалните медиуми секогаш има многу реклами и најави за различни курсеви и настани, и многу од нив ми биле препорачани од пријатели или од мајка ми, но за повеќето немав никаков интерес и заборавав дека воопшто сум ги видел 5 минути подоцна.

Но овој курс веднаш ми го привлече вниманието и многу се заинтересирав за него. Веројатно има врска и тоа што и претходно по малку имав истражувано за 3D анимација, а и имав слушнато и за компанијата fx3x.

2. Од каде потекнува интересот за оваа област? Дали имавте некакво предзнаење?

Најголемиот интерес ми потекнува од тоа што во иднина би сакал да правам игри и би сакал да имам функционално познавање од сите улоги кои се потребни за тоа да се оствари.

Имам минимално предзнаење за моделирање во Blender, но во програмите што се обработуваат во курсот немав никакво искуство или предзнаење.

3. Какви се впечатоците и искуствата од обуката до сега? Што Ви остави најголем впечаток?

Имам општо доста добар впечаток за курсот.

Веќе запознав два од четирите професори што ни предаваат и веќе многу имам научено од нив и имам доверба дека ќе ме научат и уште повеќе. Дури и за време на паузите имаат многу трпение за сите мои прашања од секаков вид, што ми се допаѓа.

4. Како би сакале да го продолжите кариерниот пат? Кои се Вашите очекувања по завршувањето на обуката?

Засега се уште немам специфичен план за тоа. Имам многу различни интереси што ги проучувам во моментот. Идеално јас дел од времето би бил аниматор, дел моделер, дел програмер, дел веб дизајнер, дел сликар, дел музичар.

Знам дека за некои од проектите кои би сакал еден ден да ги остварам ми се потребни знаењата што ги нуди курсот, но не би сакал да имам само една професија засекогаш или би сакал да најдам област која ќе ги обедини повеќето од моите интереси.

5. Што би им порачале на сите кои имаат интерес да се стекнат со стручни вештини од оваа област?

Ако ве интересира да работите во оваа област, многу подалеку ќе стигнете на ваков вид на интензивен и специјализиран курс отколку со разгледување по YouTube.

Посебно е корисно што овде имаш ментор за секој од различните аспекти кого можеш во кој било момент да го застанеш и да го прашаш нешто што не ти е јасно. Во другиот случај треба да оставиш коментар негде на YouTube и да се надеваш дека некој ќе го види и дека ќе има време и трпение да ти одговори, па и дека се разбира од областа и дека ќе знае ефективно тоа да го пренесе.

И уште поважно од се ова, кога си сам дома многу потешко е да запознаеш луѓе со слични интереси како тебе. Работење во 3D е секогаш тимска работа и според мене, многу важно е да имаш лични контакти во тој свет и индустрија.

ИСИДОРА ЈАНЕВА, 24 години, Штип – Учесничка на Обуката за Визуелни ефекти за филм
Дипломец на УГД Штип / Бизнис-информатика и Технички Универзитет Минхен

Исидора Јанева, во Fx3x за време на филмско снимање при Обуката за визуелни ефекти за филм.


Коментар за Исидора од Кариерната советничка, Катерина Златановска Попова, вклучена во процесот на селекција на кандидатите:

Исидора има слободен дух, љубов кон патувања и огромна пасија за филмови. Таа е отворена, комуникативна и искрена млада жена. Исидора има страст за раскажување (storytelling) и таа смета дека анимираните филмови се вистинскиот канал за тоа.

Исидора смета дека токму ова е моментот во нејзиниот живот кога треба да биде храбра и да побара повеќе за себе си со цел да ги оствари своите најголеми соништа и животни цели.

1. Што Ве мотивираше да се запишете на Обуката за Визуелни ефекти за филм

Мотивацијата за да се запишам на оваа обука произлезе од желбата да се предизвикам и да научам нешто сосема ново и поразлично од моето претходно формално образование.

Обожавам Sci-Fi филмови, особено оние чија приказна е во вселената и секогаш сум сакала да знам како тоа се создаваат овие светови па и како се снима на егзотични локации без да се напушти студиото.

2. Од каде потекнува интересот за оваа област? Дали имавте некакво предзнаење?

Немав предзнаење, но спојот на техничкото и уметничкото кое се бара во професијата Артист за Визуелни ефекти најмногу ме привлече да се пријавам.

Фактот што за време на обуките работам на делче уметност, а притоа користам математика и доста размислување за текот на настаните во една сцена дефинитивно ми го продлабочи и дополнително интересот, од оној што го имав на почетокот.

3. Какви се впечатоците и искуствата од обуката до сега? Што Ви остави најголем впечаток?

Впечатоците до сега се безмалку одлични. Имаме привилегија да работиме со професионалци кои се долго во индустријата и од кои може навистина многу да се научи.

Особено сум благодарна за посветеноста што ја имаат кон учесниците. Јас како еден од малкуте online учесници во мојата група никогаш не се осетив запоставено од страна на менторите, напротив, сите ресурси и вежби ги имам изработено со максимална поддршка од нивна страна.

Најмногу впечаток досега ми остави фактот што самата струка може да биде сконцентрирана и на само еден компјутер, што ви дава слобода со сето свое знаење да се наоѓате каде сакате и да работите – едноставно ви треба добар лаптоп.

4. Како би сакале да го продолжите кариерниот пат? Кои се Вашите очекувања по завршувањето на обуката?

Дефинитивно сакам да се занимавам со некоја струка поврзана со техника и со визуелни ефекти, но засега немам конкретен план.

Се надевам на најдоброто и отворена сум за соработка со компанијата Fx3x, па затоа ќе продолжам напорно да работам за да стекнам што повеќе знаења од периодот на обука.

5. Што би им порачале на сите кои имаат интерес да се стекнат со стручни вештини од оваа област?

Би им препорачала да се запишат на некоја ваква обука затоа што имаат можност да дискутираат со нивните ментори за разлика од гледање видео-туторијали онлајн каде недостасува можноста за интеракција и поставување специфични прашања.

Исто така, треба да имаат трпение затоа што она што се учи е комплицирано, но сепак да не се откажуваат затоа што според мене задоволството од успешно изработен проект е огромно.